ދިވެހިރާއްޖޭގެ ސުޕްރީމް ކޯޓު
މާލެ، ދިވެހިރާއްޖެ
ސިވިލް ކޯޓާއި ފެމެލީ ކޯޓުގެ އިޚްތިޞާޞްއާ ގުޅޭ
ކޯޓުތަކުގެ އިޚްތިޞާޞްތަކާއި މަސައްކަތްތައް ހިންގުމުގެ އުސޫލުތައް ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގައި ބަޔާންކޮށްފައިވީހިނދު، ކޯޓުތަކުގެ މަސައްކަތްތައް ތަރުތީބުވެ އިންތިޒާމްކުރެވިފައި އޮންނަންވާނީ އެ ޤާނޫނުގައި ކަނޑައަޅައި ބަޔާންކޮށްފައިވާ ގޮތުގެމަތިންނެވެ.
ދިވެހިރާއްޖޭގެ ކޯޓުތަކުގެ ޤާނޫނުގެ 53 ވަނަ މާއްދާގެ (ށ) ގެ (1) ވަނަ ނަންބަރުގެ ދަށުން ގާއިމުކުރެވުނު ސިވިލް ކޯޓާއި، އެ އަކުރުގެ (3) ވަނަ ނަންބަރުގެ ދަށުން ގާއިމުކުރެވުނު ފެމިލީ ކޯޓުގެ އިޚްތިޞާޞްތައް އެ ޤާނޫނުގެ ޖަދުވަލު 1 އަދި 3 ގައި ބަޔާންކޮށްފައިވާއިރު، މަދަނީ މައްސަލަތަކުގެ ތެރެއިން ޢާއިލީ މައްސަލަތައް ފިޔަވައި އެންމެހައި މަދަނީ މައްސަލަތައް ބެލުމުގެ އިޚްތިޞާޞް ސުޕީރިއަރ ކޯޓުތަކުގެ ތެރޭގައި ހިމެނޭ ސިވިލް ކޯޓަށް ލިބިގެންވާކަމަށް އެ ޤާނޫނުގެ ޖަދުވަލު 1 ގައި ބަޔާންކުރުމަށްފަހު، ފެމިލީ ކޯޓުގެ މަސައްކަތްތައް ބެހިގެންވާގޮތާއި އެ ކޯޓުން ބަލާ މައްސަލަތައް އެ ޤާނޫނުގެ ޖަދުވަލު 3 ގައި ބަޔާންކޮށްފައިވާތީ އާއި ދިވެހިރާއްޖޭގެ ސުޕްރީމް ކޯޓުގެ ނަންބަރު 2015/02/SC ސަރކިއުލަރގެ ދަށުން ސިވިލް ކޯޓުގައި 5 ޑިވިޜަން ގާއިމުކޮށް ތަރުތީބުކުރެވިފައިވާ ގޮތުން ހަމަހަމަ އުސޫލުން މަސައްކަތްތައް އިންތިޒާމްކުރުމަށް ހުރަސްއެޅޭތީ، ސިވިލް ކޯޓުގެ 05 ޑިވިޝަން ގާއިމުކޮށް،ހިބައާއި ވަސިއްޔަތާއި ތަރިކައިގެ މައްސަލަތަކާއި ވާރިޘުން ގިންތިކުރުމުގެ މައްސަލަތަކާއި މައިންބަފައިންގެ ގެދޮރަށް ވައްދައިދިނުމަށް އެދި ހުށަހެޅޭ މައްސަލަތައް ބަލާނީ އެކަމަށްޓަކައި ފެމިލީ ކޯޓުގައި ގާއިމުކުރެވޭ ޑިވިޜަނުން ކަމަށް ކަނޑައަޅައި 2015 ޖަނަވަރީ 08 ވަނަ ދުވަހު ނެރެފައިވާ ދިވެހިރާއްޖޭގެ ސުޕްރީމް ކޯޓުގެ ނަންބަރު 2015/02/SC ސަރކިއުލަރ ބާޠިލުކޮށް، ސިވިލް ކޯޓާއި ފެމިލީ ކޯޓުން ދިވެހިރާއްޖޭގެ ކޯޓުތަކުގެ ޤާނޫނުގައި ކަނޑައަޅާފައިވާ އިޚްތިޞާޞްއާ އެއްގޮތްވާ ގޮތުގެމަތިން މައްސަލަ ބަލަމުން ގެންދާގޮތަށް ހަމަޖައްސައިފީމެވެ. އަދި މިގޮތަށް ހަމަޖެހުމުން އެ ސަރކިއުލަރގެ ދަށުން ސިވިލް ކޯޓުގައި ގާއިމުކުރެވިފައިވާ ޑިވިޜަންތައް އުވިގެންދިޔައީއެވެ.
ބުނެވިދިޔަ ގޮތުގެމަތިން ދިވެހިރާއްޖޭގެ ސުޕްރީމް ކޯޓުގެ ނަންބަރު 2015/02/SC ސަރކިއުލަރ ބާޠިލުވުމާ ގުޅިގެން ހަމަޖައްސަންޖެހޭ އެންމެހައި އިންތިޒާމްތައް 2012 ޖަނަވަރީ 31 ގެ ނިޔަލަށް ސިވިލް ކޯޓާއި ފެމިލީ ކޯޓުން ހަމަޖެއްސުމަށް ދެންނެވީމެވެ.
މި ޕްރެކްޓިސް ޑައިރެކްޝަންގައިވާ ގޮތުގެމަތިން ޢަމަލުކުރަން ފަށާނީ 2022 ފެބުރުވަރީ 01 ވަނަ ދުވަހުން ފެށިގެންނެވެ. އަދި މި ޕްރެކްޓިސް ޑައިރެކްޝަންއަށް ޢަމަލުކުރަން ފެށުމާއެކު ދިވެހިރާއްޖޭގެ ސުޕްރީމް ކޯޓުން 2015 ޖަނަވަރީ 08 ގައި ނެރެފައިވާ ނަންބަރު 2015/02/SC ސަރކިއުލަރ އާއި 2015 ޖަނަވަރީ 14 ގައި ނެރެފައިވާ ނަންބަރު 2015/04/SC ސަރކިއުލަރ އާއި 2019 ޖުލައި 29 ގައި ނެރެފައިވާ ނަންބަރު 2019/04/SC ސަރކިއުލަރ ބާޠިލުވީއެވެ.
01 ޖުމާދަލްއާޚިރާ 1443
04 ޖަނަވަރީ 2022
އަޙްމަދު މުޢުތަޞިމް ޢަދުނާން
ދިވެހިރާއްޖޭގެ އުއްތަމަ ފަނޑިޔާރު
ޝަރުޢީ ކޯޓުތައް
ޖުޑީޝަލް ސަރވިސް ކޮމިޝަން
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންތ
