ދިވެހިރާއްޖޭގެ ސުޕްރީމް ކޯޓު
މާލެ، ދިވެހިރާއްޖެ
މަދަނީ މައްސަލަތަކުގެ އަމުރުތަކާއި ހުކުމްތަކާއި ނިންމުންތައް ތަންފީޒުކުރުން ފަސްކުރުމާބެހޭ
- ދިވެހިރާއްޖޭގެ ކޯޓުތަކުން ބަލަމުންގެންދާ މައްސަލަތަކުގެ ތެރެއިން މަދަނީ މައްސަލަތަކުގައި ނެރެފައިވާ އަމުރުތަކާއި ހުކުމްތަކާއި ނިންމުންތައް ތަންފީޒުކުރުން ފަސްކުރުމަށް މަތީ މަރުހަލާއެއްގެ ކޯޓަކުން އަމުރުކޮށްފައި ނުވާނަމަ އެ އަމުރެއް ނުވަތަ ހުކުމެއް ނުވަތަ ނިންމުމެއް، ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 77 ވަނަ މާއްދާގައިވާ ގޮތުގެމަތިން ތަންފީޒުކުރަންވާނެއެވެ.
- ދިވެހިރާއްޖޭގެ ކޯޓުތަކުން ބަލަމުންގެންދާ މައްސަލަތަކުގެ ތެރެއިން މަދަނީ މައްސަލައެއްގައި ނެރެފައިވާ އަމުރެއް ނުވަތަ ހުކުމެއް ނުވަތަ ނިންމުމެއް ތަންފީޒުކުރުން ފަސްކުރުމަށް އެ މައްސަލައިގެ ޚަސްމަކު ނުވަތަ އެ މައްސަލައެއްގައި މަސްލަހަތު އޮތް ފަރާތަކުން އިސްތިއުނާފް ކޯޓެއްގައި އެދެންވާނީ އެކަމަށްޓަކައި އެ ކޯޓަކުން ކަނޑައަޅާފައިވާ ފޯމުންނެވެ.
- އަމުރެއް ނުވަތަ ހުކުމެއް ނުވަތަ ނިންމުމެއް ތަންފީޒުކުރުން ފަސްކުރުމަށް އިސްތިއުނާފް ކޯޓަކުން އަމުރުކުރަންވާނީ ހުކުމް ތަންފީޒުކުރުން ފަސްކުރުމަށް އެދި ހުށަހެޅި ހުށަހެޅުމުގައި އަންނަނިވި ޝަރުތުތައް ފުރިހަމަވާކަމަށް އިސްތިއުނާފް ކޯޓަށް ގަބޫލުކުރެވިއްޖެނަމަ އެވެ.
- (ހ) އިސްތިއުނާފް ކޯޓުން އަމުރު ނުވަތަ ހުކުމް ނުވަތަ ނިންމުން ތަންފީޒުކުރުން ފަސްކޮށްނުދީފިނަމަ، އެކަމުގެ ސަބަބުން އިއާދަނުކުރެވޭނެ ގެއްލުމެއް ލިބޭނެކަން، ނުވަތަ
- (ށ) އަމުރު ނުވަތަ ހުކުމް ނުވަތަ ނިންމުމާ އެއްގޮތަށް ޢަމަލުކުރާނެ ކަމުގެ ޔަގީންކަން ދިނުމުގެ ގޮތުން ކޯޓުން ގަބޫލުކުރާ ނަމޫނާ އަކާ އެއްގޮތަށް ސެކިއުރިޓީ ހުށަހަޅާފައިވުން.
- މަތީގައި ބަޔާންކުރެވުނު 3 ވަނަ ނަންބަރުގެ ދަށުން އަމުރެއް ނުވަތަ ހުކުމެއް ނުވަތަ ނިންމުމެއް ތަންފީޒުކުރުން ފަސްކުރުމަށް ކޯޓަކުން އަމުރުކުރުމުގައި، އެ ހުކުމަކީ ފައިސާދެއްކުމަށް އަންގައި ކޮށްފައިވާ ހުކުމެއް ނަމަ، ހުކުމާ އެއްގޮތަށް ފައިސާ ދައްކަންޖެހޭ ފަރާތުން1"ހުކުމް ތަންފީޒުކުރަން އެދޭ ފަރާތުން" މިގޮތަށް ކުރިން ބަޔާންވެފައިވަނީ ލިޔުމުގެ ކުށަކުންކަމަށްވާތީ އިޞްލާޙުކުރެވިފައި. އެ ހުކުމާ އެއްގޮތަށް ހުކުމްކުރި ކޯޓަށް ފައިސާ ދައްކަމުން ގެންދިއުމަށާއި، އެ ފައިސާއާ މެދު ވަކިގޮތަކަށް ޢަމަލުކުރަން އެ ކޯޓުން އަންގަންދެން ނުވަތަ މައްސަލައިގައި ހުކުމްކުރަންދެން އެ ފައިސާ އެއްވެސް ފަރާތަކަށް ދޫނުކޮށް ހުކުމްކުރި ކޯޓުގައި ބެހެއްޓުމަށް އަމުރުކުރުމުގެ އިޚްތިޔާރު އިސްތިއުނާފް ކޯޓަށް ލިބިގެންވެއެވެ.
- މި ޕްރެކްޓިސް ޑައިރެކްޝަންގައިވާ ގޮތުގެމަތިން، ތަންފީޒުކުރުން ފަސްކުރުމުގެ އަމުރެއް އަޑުއެހުމެއް ބޭއްވުމަށް ފަހު ނުވަތަ އަޑުއެހުމެއް ބޭއްވުމަކާ ނުލައި ނެރެވިދާނެއެވެ. އަދި މައްސަލަ ރައްދުވާ ފަރާތުގެ ބަހެއް ހޯދުމެއް ނެތި، މައްސަލައިގެ ޒާތަށާއި ހުށަހެޅިފައިވާ ލިޔެކިޔުންތަކަށާއި ވަށައިގެންވާ ކަންތައްތަކަށް ރިޢާޔަތްކުރުމަށް ފަހު، ތަންފީޒުކުރުން ފަސްކުރުމުގެ އަމުރެއް ނެރުމުގެ އިޚްތިޔާރު އިސްތިއުނާފް ކޯޓުތަކަށް ލިބިގެންވެއެވެ.
- މި ޕްރެކްޓިސް ޑައިރެކްޝަންގައި "މަދަނީ މައްސަލަ" ކަމަށް ބަޔާންކޮށްފައި އެވަނީ ޖިނާއީ މައްސަލަތައް ފިޔަވައި އެނޫން ހުރިހާ ބާވަތެއްގެ މައްސަލަތަކަށެވެ.
- މި ޕްރެކްޓިސް ޑައިރެކްޝަން ނެރުމުން ދިވެހިރާއްޖޭގެ ހައިކޯޓުގެ ނަންބަރު 95/2021/1 (01 ނޮވެމްބަރު 2021) ޢާއްމު ސިޓީ ބާތިލުވީއެވެ.
27 ރަބީޢުލްއައްވަލް 1443
02 ނޮވެންބަރު 2021
އަޙްމަދު މުޢުތަޞިމް ޢަދުނާން
ދިވެހިރާއްޖޭގެ އުއްތަމަ ފަނޑިޔާރު
ޝަރުޢީ ކޯޓުތައް
ޓްރައިބިއުނަލްތައް
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން
ފުޓްނޯޓްސް
- 1"ހުކުމް ތަންފީޒުކުރަން އެދޭ ފަރާތުން" މިގޮތަށް ކުރިން ބަޔާންވެފައިވަނީ ލިޔުމުގެ ކުށަކުންކަމަށްވާތީ އިޞްލާޙުކުރެވިފައި.